Выстаўка жывапісу «Сэрца, аддадзенае Гродзеншчыне»

ул. Советская 8

ул. Советская 8
пн, 23 октября - вс, 29 октября

Выстаўка жывапісу «Сэрца, аддадзенае Гродзеншчыне», прысвечаная памяці Фелікса Антонавіча Шунейка

29 верасня 2017 года ў 15:00 ў выставачнай зале Гродзенскага абласнога метадычнага цэнтра (вул. Савецкая, 8) адкрываецца выстаўка жывапісу «Сэрца, аддадзенае Гродзеншчыне», прысвечаная памяці Фелікса Антонавіча Шунейка (1917-2006), вядомага мастака-тэкстыльшчыка, даследчыка традыцыйнай культуры Гродзеншчыны.

Імя Ф.А.Шунейкі добра вядома на Гродзеншчыне. Сюды малады мастак прыехаў з Мінску ў 1947 годзе і пачаў працаваць метадыстам у тагачасным абласным Доме народнай творчасці. Адразу стварыў лабараторыю па даследванні традыцыйнага ткацтва Гродзеншчыны. На працягу 50-60 гадоў мінулага стагоддзя калектыў народных ткачых лабараторыі ствараў буйнамаштабныя габелены ў стылі традыцыйнага ткацтва. Многія рукатворныя шэдэўры былі замоўлены для значных дзяржаўных мерапрыемстваў былога БССР і СССР.

На пачатку 1980-х гадоў Фелікс Шунейка разам з дачкой Аленай і сынам Яўгенам усталявалі ўнікальны вертыкальны ткацкі станок шырынёй 2,5 метры і вышынёй 3,0 метры ў Гродзенскім абласным метадычным цэнтры народнай творчасці, які і сення знаходзіцца ў рабочым стане .

Выстаўка «Сэрца, аддадзенае Гродзеншчыне» яб’яднала мастакоў, якія ў жывапісу, графіцы, ткацтве шчыра звязваюць сваю творчасць з вобразамі роднага краю. Сярод удзельнікаў – сябры творчага аб’яднання «Абуджэнне»: Андрэй Лычкоўскі з Узды, Фёдар Ладуцька і Яўген Шунейка з Мінску, Алена Шунейка з Гродна.

Упершыню ў г.Гродна выстаўляюцца мастакі творчага аб’яднання «Арт-Слонім»: Яўген Іваноў, Андрэй Сідараў, Уладзімір Макарэвіч, Васіль Грыневіч, Казімір Кулеш, Тамара і Алесь Сцяцэнка.

У экспазіцыі будуць прадстаўлены мастацкія творы, створаныя па матывах гісторыка-культурных падзей, прыродных і архітэктурных пейзажаў Гродна і Гродзеншчыны, а тасама дакументальныя матэрыялы, прысвечаныя жыццядзейнасці Ф.А.Шунейка.

Выстаўка сцвярджае значнасць вывучэння і развіцця творчых традыцый Гродзеншчыны, жывучую сувязь і пераемнасць пакаленняў у мастацкім услаўленні роднага краю.