Гродненская афиша

4-11 лістапада ў Гродна пройдуць “Дні Губерта”. У найноўшай гісторыі нашага горада гэта ўжо другое адзначэнне Дзён горада, першыя Дні прайшлі ў мінулым годзе.

4 лістапада (серада), 16.00, Тронная зала Старога Замка – першая ў Беларусі прэзентацыя кнігі “Рыцары і дойліды Гародні”, а таксама ўрачыстае адкрыццё выставы малюнкаў, паводле якіх паўставала ўнікальная кніга. Удзел возьмуць аўтар кнігі, гісторык Алесь Краўцэвіч, мастак-ілюстратар Павал Татарнікаў, дызайнер Сяргей Расолька, музыкі Зміцер Сідаровіч і Зміцер Вайцюшкевіч.

Падчас прэзентацыі будзе праведзена дабрачынная латарэя, здабытак з якой пойдзе на патрэбы гарадзенскіх музеяў. Пачатак – 16.00, уваход вольны.

5 лістапада (чацвер), 18.30, Будзёнага 48а-44 (памяшканне Таварыства Беларускай Школы) – творчая сустрэча з бардам Віктарам Шалкевічам. Нагодай ёсць кніжны дэбют мэтра беларускага шансона - “Блюз Вясна”.

Пачатак сустрэчы – 18.30, уваход вольны.

7 лістапада (субота), 9.30-19.00, Будзёнага 48а-44 (памяшканне Таварыства Беларускай Школы) ІІ Міжнародная навуковая канферэнцыя “Гарадзенскі палімпсест. Дзяржаўныя ўстановы і палітычнае жыццё Гародні. ХV – XX стст.”

У канферэнцыі возьмуць удзел даследчыкі гарадзенскай даўніны з Гродна, Мінска, Аполе, Варшавы: Алесь Смалянчук, Наталля Сліж, Аляксей Шаланда, Ганна Паўлоўская, Андрэй Радаман, Зміцер Яцкевіч, Вадзім Урублеўскі, Віталь Галубовіч, Зміцер Віцько, Іна Соркіна, Сяргей Токць, Вольга Сабалеўская, Сяргей Жумар ды інш.

8 лістапада (нядзеля), 11.00-13.00, Будзёнага 48а-44 (памяшканне Таварыства Беларускай Школы) – Круглы стол “Гарадзенскі “Новы свет”. Перспектывы рэнавацыі і захавання”.

Удзел у абмеркаванні захавання і перспектываў гарадзенскага раёна “Новы свет” возьмуць гісторыкі і грамадскія актывісты Андрэй Вашкевіч, Ігар Лапеха, Сцяпан Стурэйка, Хрысціна Марчук, Юля Катаржынская, Віталь Вановіч ды інш. Будзе прэзентаваны мультымедыйны дыск “Фотаплэнэр Адкрый Новы свет”.

Пачатак сустрэчы – 11.00, уваход вольны.

З 9 па 11 лістапада (панядзелак-серада) пройдзе гарадзенскі фестываль дакументальных фільмаў “Свабоднае кіно”.

9 лістапада – трылогія “Беларусь пад нямецкай акупацыяй”. Гарадзенскі паказ будзе першым у Беларусі. Пачатак – 19.00, уваход вольны.

10 лістапада – “Моц бяссільных”. Гэта шчырая, без таямніц тая частка гісторыі чэшскага народа, калі Чэхія была пад камуністычным рэжымам. Пачатак – 19.00, уваход вольны.

11 лістапада – “Пагроза”. Гэта фільм пра новага “сябру” Беларусі, прэзідэнта Венэсуэлы Уга Чавеса, і штодзённае жыццё звычайных жыхароў гэтай краіны… Пачатак – 19.00, уваход вольны.

Увага! Усе фільмы суправаджаюцца беларускамоўнымі цітрамі.

Святы Губерт – заступнік Гародні. Гісторыя Гародні - гэта гісторыя еўрапейскага горада. Традыцыі, якія нараджаліся ў далёкіх еўрапейскіх краінах, з лёгкасцю і вельмі натуральна прыжываліся тут і хутка станавіліся сваімі. На дзень Святога Губерта, які адзначаецца 3 лістапада, у мінулым прыпадаў у Гародні Дзень горада. Сюжэт са сцэнай з’яўлення Аленя з залатым крыжам паміж рагамі перад Губертам, а менавіта такім ёсць герб нашага горада, быў вельмі папулярны сярод гарадзенцаў.